A Súa Maxestade o Rei don Juan Carlos
A Súa Maxestade o Rei don Juan Carlos I naceu o 5 de xaneiro de 1938 en Roma, onde residía a Familia Real, que tivo que abandonar España ao proclamarse a República en 1931. Foron seus pais don Juan de Borbón e Battenberg, conde de Barcelona e xefe da Casa Real española desde a renuncia do seu pai o rei don Afonso XIII, e dona María de las Mercedes de Borbón e Orleáns.
Por expreso desexo do seu pai, a súa formación fundamental desenvolveuse en España, á que chegou por primeira vez aos dez anos, procedente de Portugal, onde residían os condes de Barcelona desde 1946, na casa atlántica de Estoril, e tras a súa etapa como alumno interno no colexio dos Marianistas da cidade suíza de Friburgo.
Formación académica
En 1954 terminou o bacharelato no instituto San Isidro, de Madrid, e desde 1955 estudou nas academias e escolas militares dos tres exércitos, onde adquiriu o grao de oficial. Nesta etapa realizou a súa viaxe de prácticas como garda mariña no buque escola Juan Sebastián Elcano e obtivo o seu título de piloto militar. En 1960-1961 completou a súa formación na Universidade Complutense de Madrid, onde cursou estudos de Dereito Político e Internacional, Economía e Facenda Pública.
O 14 de maio de 1962 contraeu matrimonio en Atenas coa SAR a Princesa Sofía de Grecia, primoxénita das Súas Maxestade os Reis Pablo I e Federica. Logo da súa viaxe de vodas, os príncipes comezaron a vivir no Palacio da Zarzuela, nos arredores de Madrid, que segue sendo hoxe a súa residencia. En 1963 naceu a primeira dos seus tres fillos, a SAR a Infanta dona Elena, dous anos máis tarde a SAR a Infanta dona Cristina e en 1968 a SAR o Príncipe don Felipe.